โสปิ พุทฺโธ อสมสโม, อสีติหตฺถมุคฺคโต;
โสภเต สาลราชาว, อุฬุราชาว ปูริโตฯ
[23]
ตสฺส ปากติกา รํสี, อเนกสตโกฏิโย;
อุทฺธํ อโธ ทส ทิสา, ผรนฺติ โยชนํ สทาฯ
[24]
โสปิ พุทฺโธ นราสโภ, สพฺพสตฺตุตฺตโม มุนิ;
วสฺสสตสหสฺสานิ, โลเก อฏฺฐาสิ จกฺขุมาฯ
[25]
อตุลํ ทสฺเสตฺวา โอภาสํ, วิโรเจตฺวา สเทวเก [อตุลํ ทสฺสยิตฺวาน, โอภาเสตฺวา สเทวเก (สี. ก.)];
โสปิ อนิจฺจตํ ปตฺโต, ยถคฺคุปาทานสงฺขยาฯ
[26]
อตฺถทสฺสี ชินวโร, อโนมารามมฺหิ นิพฺพุโต;
ธาตุวิตฺถาริกํ อาสิ, เตสุ เตสุ ปเทสโตติฯ
อตฺถทสฺสิสฺส ภควโต วํโส จุทฺทสโมฯ
17. ธมฺมทสฺสีพุทฺธวํโส
[1]
ตตฺเถว มณฺฑกปฺปมฺหิ, ธมฺมทสฺสี มหายโส;
ตมนฺธการํ วิธมิตฺวา, อติโรจติ สเทวเกฯ
[2]
ตสฺสาปิ อตุลเตชสฺส, ธมฺมจกฺกปฺปวตฺตเน;
โกฏิสตสหสฺสานํ, ปฐมาภิสมโย อหุฯ
[3]
ยทา พุทฺโธ ธมฺมทสฺสี, วิเนสิ สญฺชยํ อิสิํ;
ตทา นวุติโกฏีนํ, ทุติยาภิสมโย อหุฯ
[4]
ยทา สกฺโก อุปาคญฺฉิ, สปริโส วินายกํ;
ตทา อสีติโกฏีนํ, ตติยาภิสมโย อหุฯ
[5]
ตสฺสาปิ เทวเทวสฺส, สนฺนิปาตา ตโย อหุํ [อาสุํ (สี. สฺยา.)];
ขีณาสวานํ วิมลานํ, สนฺตจิตฺตาน ตาทินํฯ
[6]
ยทา พุทฺโธ ธมฺมทสฺสี, สรเณ วสฺสํ อุปาคมิ;
ตทา โกฏิสตสหสฺสานํ [โกฏิสหสฺสานํ (สี. สฺยา. กํ.)], ปฐโม อาสิ สมาคโมฯ
[7]
ปุนาปรํ ยทา พุทฺโธ, เทวโต เอติ มานุสํ;
ตทาปิ สตโกฏีนํ, ทุติโย อาสิ สมาคโมฯ
[8]
ปุนาปรํ ยทา พุทฺโธ, ปกาเสสิ ธุเต คุเณ;
ตทา อสีติโกฏีนํ, ตติโย อาสิ สมาคโมฯ
[9]
อหํ เตน สมเยน, สกฺโก อาสิํ ปุรินฺทโท;
ทิพฺเพน คนฺธมาเลน, ตุริเยนาภิปูชยิํฯ
[10]
โสปิ มํ พุทฺโธ พฺยากาสิ, เทวมชฺเฌ นิสีทิย;
‘‘อฏฺฐารเส กปฺปสเต, อยํ พุทฺโธ ภวิสฺสติฯ
[11]
‘‘ปธานํ ปทหิตฺวาน…เป.… เหสฺสาม สมฺมุขา อิมํ’’ฯ
[12]
ตสฺสาปิ วจนํ สุตฺวา, ภิยฺโย จิตฺตํ ปสาทยิํ;
อุตฺตริํ วตมธิฏฺฐาสิํ, ทสปารมิปูริยาฯ
[13]
สรณํ นาม นครํ, สรโณ นาม ขตฺติโย;
สุนนฺทา นาม ชนิกา, ธมฺมทสฺสิสฺส สตฺถุโนฯ
[14]
อฏฺฐวสฺสสหสฺสานิ , อคารํ อชฺฌ โส วสิ;
อรโช วิรโช สุทสฺสโน, ตโย ปาสาทมุตฺตมาฯ
[15]
ติจตฺตารีสสหสฺสานิ [จตฺตาลีสสหสฺสานิ (สฺยา. กํ.)], นาริโย สมลงฺกตา;
วิจิโกฬิ นาม นารี, อตฺรโช ปุญฺญวฑฺฒโนฯ
[16]
นิมิตฺเต จตุโร ทิสฺวา, ปาสาเทนาภินิกฺขมิ;
สตฺตาหํ ปธานจารํ, อจรี ปุริสุตฺตโมฯ
[17]
พฺรหฺมุนา ยาจิโต สนฺโต, ธมฺมทสฺสี นราสโภ;
วตฺติ จกฺกํ มหาวีโร, มิคทาเย นรุตฺตโมฯ
[18]
ปทุโม ผุสฺสเทโว จ, อเหสุํ อคฺคสาวกา;
สุเนตฺโต [สุทตฺโต (สฺยา. กํ.)] นามุปฏฺฐาโก, ธมฺมทสฺสิสฺส สตฺถุโนฯ
[19]
เขมา จ สจฺจนามา จ, อเหสุํ อคฺคสาวิกา;
โพธิ ตสฺส ภควโต, พิมฺพิชาโลติ วุจฺจติฯ
[20]
สุภทฺโท กฏิสฺสโห เจว, อเหสุํ อคฺคุปฏฺฐกา;
สาฬิยา [สาลิสา (สฺยา. กํ.)] จ กฬิยา จ, อเหสุํ อคฺคุปฏฺฐิกาฯ
[21]
โสปิ พุทฺโธ อสมสโม, อสีติหตฺถมุคฺคโต;
อติโรจติ เตเชน, ทสสหสฺสิมฺหิ ธาตุยาฯ
[22]
สุผุลฺโล สาลราชาว, วิชฺชูว คคเน ยถา;
มชฺฌนฺหิเกว สูริโย, เอวํ โส อุปโสภถฯ
[23]
ตสฺสาปิ อตุลเตชสฺส, สมกํ อาสิ ชีวิตํ;
วสฺสสตสหสฺสานิ, โลเก อฏฺฐาสิ จกฺขุมาฯ
[24]
โอภาสํ ทสฺสยิตฺวาน, วิมลํ กตฺวาน สาสนํ;
จวิ จนฺโทว คคเน, นิพฺพุโต โส สสาวโกฯ
[25]
ธมฺมทสฺสี มหาวีโร, สาลารามมฺหิ นิพฺพุโต;
ตตฺเถวสฺส ถูปวโร, ตีณิโยชนมุคฺคโตติฯ
ธมฺมทสฺสิสฺส ภควโต วํโส ปนฺนรสโมฯ
18. สิทฺธตฺถพุทฺธวํโส
[1]
ธมฺมทสฺสิสฺส อปเรน, สิทฺธตฺโถ นาม นายโก;
นิหนิตฺวา ตมํ สพฺพํ, สูริโย อพฺภุคฺคโต ยถาฯ
[2]
โสปิ ปตฺวาน สมฺโพธิํ, สนฺตาเรนฺโต สเทวกํ;
อภิวสฺสิ ธมฺมเมเฆน, นิพฺพาเปนฺโต สเทวกํฯ
[3]
ตสฺสาปิ อตุลเตชสฺส, อเหสุํ อภิสมยา ตโย;
โกฏิสตสหสฺสานํ, ปฐมาภิสมโย อหุฯ
[4]
ปุนาปรํ ภีมรเถ [หิมรฏฺเฐ (ก.)], ยทา อาหนิ ทุนฺทุภิํ;
ตทา นวุติโกฏีนํ, ทุติยาภิสมโย อหุฯ
[5]
ยทา พุทฺโธ ธมฺมํ เทเสสิ, เวภาเร โส ปุรุตฺตเม;
ตทา นวุติโกฏีนํ, ตติยาภิสมโย อหุฯ
[6]
สนฺนิปาตา ตโย อาสุํ, ตสฺมิมฺปิ ทฺวิปทุตฺตเม;
ขีณาสวานํ วิมลานํ, สนฺตจิตฺตาน ตาทินํฯ
[7]